_________
日本全國大賽 2023.11.4-5
事前篇
事源阿健在5月在group報料話11月日本有WRE比賽，拿拿林用里數換左2號去6號返機票，不久留只快閃幾日。後來見到陸續都有會友示意會去，能想像會有不少香港人過去比賽。
到了8月，我去完瑞士返來，聽到老細牙痛，聽得出唔係好鍾意我成日請假。所以再將行程壓縮，變成3號下午去6號朝早返，想去完都唔覺我去過咁。
呢個比賽在千葉縣勝浦，千葉縣係一個半島，與東京隔左個東京灣(哥斯拉出沒注意)，向住東京灣那邊是市區，向住太平洋果邊就係郊區，勝浦就是向太平洋呢邊，係沖浪勝地，同食海鮮渡假嘅地方。
起初要book酒店時都遇到阻滯，因當地不算很熱門的旅遊地區，房間有限，突然有成千人來，會唔夠房住。我曾經去過agoda, booking等網睇，一係好L貴，一係好L遠，最後都係睇返官方推薦嘅民宿，可惜撳晒咁多間可以網上預約的都滿晒，無計可施下我寫左個email俾organizer，叫佢幫我搵幾間要電話預約的民宿。可惜他回覆話都係full晒，叫我試下去鄰站御宿找，只隔一個車站，都好方便。最後，我在google translate 幫助下，在local 民宿網站成功預約，一泊兩食，仲係唔使預付，住完先俾錢。
出發前一星期
阿健問我會唔會帶張天幕去，我好爽快答左會。但因小弟不嬲冇良好的收拾習慣，要搵齊D架撑都唔容易。用左幾日搵齊之後，發現有D繩斷左，有D釘彎左。咁又要去買過D繩執返佢，同埋去鎚返直D釘。搞完之後，先諗起我去程改左搭hkexpress, 冇買寄倉行李，所以張天幕係帶唔到!此下當然係搖旗求救，首領Bruce首先提出幫手，他也去日本，但唔係去比賽。他2號去，可是佢係去成田機場(我羽田)，想利用locker交收都唔得。好彩後尾搵到阿濱，佢係搭CX去，可以寄倉。所以馬上帶張天幕俾佢，大家有得遮陰都要多得佢。
出發日
當日星期五，上晝都仲返緊工，向各位伙伴交帶過後，下午lunch後就出發。以往出門，冇一次唔係趕頭趕命，今次時間比較充裕，就去左環亞lounge食嘢。好彩唔係旺季，lounge唔係好多人，食到飽，飲到飽，睇電視睇到飽先上機。
好多年冇搭UO，座位空間比印象中濶落(可能係我瘦左，呵)，但都要幾有耐性先等到落機。見窗外條登機橋搞左好耐先set好，花左十幾分鐘，我睇下時間，已經過左23點，有D擔心冇車搭。點知出到入境大堂，嘩，人山人海! 目測有幾百人排隊等過關，但都冇乜辦法，只能耐等候，有D後悔響lounge hea左幾個鐘。終於成00:30先出到閘，當時電車已經收晒車，只係剩低一班去新宿/池袋的巴士01:00開。我在機場arrival 和 departure 四周走了一圈，發現好多人已經set晒架步準備瞓覺，長凳，陰角都有人霸左。經過food court, 看到原來mos burger 吉野家開通宵，咁就決定瞓機場一晚。後尾唔知點解咁好彩，俾我搵到張長凳冇人，就響庶休息。
比賽第一日，中距離
晨早四點幾就起身，其實冇乜點瞓，去搭5:00首班巴士，但唔知邊度買車飛。行來行去，心諗應該在巴士站附近。原來部賣飛機0450先有人開閘，有驚無險地順利買完飛上巴士。巴士駁電車，去到勝浦已是3小時之後，剛剛接上第一班大會車。
去到event centre, 係一間學校。工作人員在忙碌set場。好快阿濱亦到達了，我哋就起左張天幕，換衫換鞋等出發。慢慢ya人，及香港友會的人也結集一齊，熱身出發。
此場地有D似大棠，又似牛寮，山咀山窩密集，落山好斜下。有好幾次都係瀡落去，泥土鬆散，著釘鞋都停唔到。最難係好容易認錯咀認錯窩，稍不留神就落錯，知道錯左要躝返上去都幾甘。比賽路線upload左去livelox。日本人好勁好快，我哋分析係同場地有關，他們從小已經可以多運用技術，用到極致純熟，香港人要加把勁。
住宿是間家庭經營的民宿，應該已經營了幾十年，可能更耐。店主非常友善，一泊兩食包晚餐和早餐，晚餐是日式，每人十幾碟嘢擺滿一枱，每款都好精緻，好好吃。食完飯已經有人在房間鋪好床鋪。可以瞓覺好了。
比賽第二日，長距離
經過一天的休息，能量升返唔少，加上昨天的經驗，今日表現應該比昨天好。event centre都係同一地方，今日是用賽區南面。賽程不算太難，只係唔可以錯得太遠。因為地形太多similar feature, 稍一失位要馬上確認返自己響邊，否則要搵返自己響邊都幾難。賽區冇大石頭，基本上只係睇等高線去辨認，山脊明明係條路又唔畫，所以都唔敢點快跑，數山丘數到智障。不停山窩山咀上落，跣到hihi聲。9人參賽排第6, 唔使包尾。
今次比賽見識到日本運動員的越野能力超高，其二是閱圖能力，點樣可以在顛簸環境下仲睇到圖，係咪應該都要訓練下?
之後同阿濱同搭早機返香港，去左機場nine hours 膠囊酒店過一晚。感覺不錯，第日晚機到或者早機走都可以選擇。